«លម្អងដួងចិត្ត» ជាភាពយន្តនិយាយពីបុព្វហេតុជីវិត – ជីវិតដែលកើតមកជាមួយនឹងក្ដីស្រមៃ – ក្ដីស្រមៃជាគោលដៅនៃការបង្ហាញពីក្ដីស្រឡាញ់ ដើម្បីបំពេញតួនាទីជាមនុស្សរបស់សង្គម និងពិភពលោកមួយ។ទៅទីណាមិនសំខាន់ សំខាន់ទៅដើម្បីអ្វី? ដើរតាមក្ដីស្រមៃ ធ្វើឱ្យខ្ញុំបានរៀនសូត្រពីក្ដីស្រឡាញ់ និងរកឃើញខ្លួនឯងកាន់តែច្បាស់។ តើយើងមានពេលវេលាប៉ុន្មាន ដើម្បីរស់នៅលើភពផែនដីនេះ ហើយអ្វីជាបុព្វហេតុពិតប្រាកដ ដែលយើងត្រូវមកដល់ទីនេះ? មកដល់ពេលវេលាមួយ ទើបខ្ញុំដឹងថា ក្ដីស្រមៃរបស់ខ្ញុំគឺគ្រាន់តែចង់បំពេញនូវក្ដីស្រមៃរបស់មនុស្សនៅជុំវិញខ្លួន ហើយយ៉ាងហោចណាស់ ក៏អាចជួយពួកគេឱ្យយល់ពីតម្លៃរបស់ខ្លួនឯង។ ពិតមែនហើយ កំណើតជាមនុស្សគឺមានតម្លៃខ្លាំងណាស់ តែបើយើងគ្រាន់តែរស់ និងប្រើប្រាស់ឆាកជីវិតក្នុងភាពអាត្មានិយម វាគឺជារឿងដ៏គួរឱ្យសោកស្ដាយ និងក្លាយជាសោកនាដកម្មមួយ។