លើកទឹកចិត្ត

ក្ដីស្រមៃ

បើគោលដៅរបស់យើងគឺជាគោលដៅមួយច្បាស់លាស់ ប្រាកដណាស់វានឹងមិនងាយផ្លាស់ប្ដូរទេ។ ឧបសគ្គជាច្រើនអាចកើតឡើងនៅក្នុងដំណើរឆ្ពោះទៅរកការសម្រេចជោគជ័យលើគោលដៅដែលយើងបានកំណត់ ប៉ុន្តែចិត្តអំណត់អត់ធ្មត់ ការតស៊ូរបស់យើងនឹងមានកាន់តែច្រើនឡើងដើម្បីទប់ទល់ ហើយធ្វើដំណើរបន្តទៅមុខ។ មធ្យោបាយដើម្បីឆ្ពោះទៅរកគោលដៅវាអាចប្រែប្រួលទៅតាមស្ថានភាពជាក់ស្ដែង ហើយបើមធ្យោបាយប្រែប្រួល នោះរយៈពេលនៃការសម្រេចជោគជ័យលើគោលដៅក៏នឹងប្រែប្រួលខ្លះៗដែរ។

ដើម្បីកុំឱ្យយើងងាយនឹងបោះបង់ ឬងាយនឹងបាត់បង់ថាមពលក្នុងការធ្វើដំណើរទៅរកគោលដៅដែលបានកំណត់រួចហើយ ដំបូងបំផុតយើងត្រូវមានគោលដៅច្បាស់លាស់ ត្រូវរកឱ្យឃើញថាអ្វីទៅជាបុព្វហេតុដែលយើងចង់ធ្វើឱ្យគោលដៅនោះសម្រេចជោគជ័យ។ បន្ទាប់ពីកំណត់គោលដៅធំរួចហើយ គឺត្រូវរៀបចំផែនការតូចៗឱ្យបានច្បាស់លាស់ កំណត់ពេលវេលាជាក់លាក់ដើម្បីចាប់ផ្ដើមផែនការចាំបាច់ដំបូងគេ។ នៅក្នុងដំណាក់កាលនៃការអនុវត្តន៍ផែនការតូចៗនេះ វាមិនមែនធ្វើទៅតាមអារម្មណ៍ទេ ប៉ុន្តែវាធ្វើទៅតាមគោលការណ៍ ឬវិន័យ។ ថ្នាក់រៀនជីវិតគ្មាននរណាមកបង្កើតវិន័យដាក់ឱ្យយើងគោរពទេ តែយើងចាំបាច់ដែលត្រូវបង្កើតឱ្យមានវិន័យសម្រាប់ខ្លួនឯង ហើយប្រតិបត្ដិតាម។ គោលដៅស្រពេចស្រពិល មិនច្បាស់លាស់ វាងាយនឹងត្រូវបានបោះបង់ចោល ឬងាយនឹងធ្វើឱ្យយើងបាត់បង់ថាមពល។

ធ្លាប់ទេ? យើងហាក់ដូចជាមានបំណងស្រពេចស្រពិលដែលចួនកាលវាផុសឡើងមួយភ្លែតក្នុងអារម្មណ៍ដ៏ច្របូកច្របល់ ហើយយើងកំណត់វាថាជាគោលដៅរបស់យើងទាំងមិនច្បាស់នៅក្នុងចិត្ត។ ពីដំបូងវាហាក់មានអ្វីម្យ៉ាងដែលជំរុញឱ្យថាមពលក្នុងខ្លួនយើងចេញមក ហើយចាប់ផ្ដើមសកម្មភាពទាំងមិនច្បាស់លាស់ គ្មានលំដាប់លំដោយ។ មិនយូរប៉ុន្មានកម្លាំងជំរុញចិត្តក៏ចាប់ផ្ដើមចុះខ្សោយជាលំដាប់។ យើងហាក់មិនប្រាកដចិត្តថាខ្លួនឯងអាចបន្តដំណើរទៅរកក្ដីស្រមៃដ៏ស្រពេចស្រពិលមួយនោះទៀតឬអត់។ យើងផ្ដើមបាត់បង់ជំនឿចិត្ត ឬក៏ថមថយកម្លាំងចិត្តដើម្បីឆ្ពោះទៅរកវា គឺពេលនោះឯង ដែលយើងចេះតែសម្លឹងរកមើលថា តើនរណាទៅដែលអាចជួយយើងបាន? តើអ្វីទៅដែលអាចធ្វើឱ្យយើងបង្កើនជំនឿចិត្តរបស់យើងម្ដងទៀត?

គ្មាននរណាម្នាក់ដែលចាំតែអង្គុយប្រាប់យើងថា យើងត្រូវធ្វើម៉េចដើម្បីទាញថាមពលនៃការប្រឹងប្រែងឱ្យដូចដើមនោះទេ ប៉ុន្តែពួកគេត្រឹមតែអាចប្រាប់ថា យើងត្រូវត្រលប់ទៅមើលឡើងវិញថាគោលដៅរបស់យើងមានភាពច្បាស់លាស់កម្រិតណា ហើយវាមានតម្លៃច្រើនប៉ុនណាសម្រាប់យើង។ បើអ្វីមួយដែលយើងចង់យក វាមានតម្លៃខ្លាំងសម្រាប់យើង នោះប្រាកដណាស់ វានឹងមិនធ្វើឱ្យយើងងាយចុះចាញ់ចំពោះឧបសគ្គដែលមករារាំងឡើយ។ ផ្ទុយទៅវិញបើយើងមិនបានផ្ដល់តម្លៃច្រើនចំពោះវាទេ វាពិបាកបន្ដិចដែលយើងត្រូវព្យាយាមរកថាមពលពីក្រៅមកជំរុញយើងដើម្បីសម្រេចគោលដៅ។

រឿងដែលពិបាកជាងគេក្នុងជីវិតគឺការស្វែងរកបុព្វហេតុនៃការរស់នៅ ឬគោលដៅចុងក្រោយនៃជីវិត ហើយរឿងដែលវាមិនអាចទៅរួចនោះគឺការចង់ទៅដល់គោលដៅមួយដោយមិនធ្វើដំណើរ។ ថាមពលដ៏ខ្លាំងក្លាដែលជំរុញយើងឱ្យដើរទៅរកគោលដៅមួយដោយជោគជ័យ គឺគោលដៅរបស់យើងហ្នឹងហើយ។ វាត្រូវតែមានថាមពលអ្វីម្យ៉ាងដ៏ខ្លាំងក្លាដែលជំរុញចេញពីគោលដៅនោះដោយផ្ទាល់ ទើបយើងមិនងាយបោះបង់ ព្រោះវាមិនអាចទៅរួចទេដែលយើងនឹងសម្រេចជោគជ័យលើគោលដៅ ដោយស្វែងរកកម្លាំងជំរុញពីខាងក្រៅ ជំនួសឱ្យការយកគោលដៅជាកម្លាំងជំរុញចិត្តនោះ។

------------------------------------------------------------------

អត្ថបទនេះដកស្រង់ចេញពីសៀវភៅ <a href="https://www.konchabmeas.com/book/5fe052ba6477ceef2b7304db">ដំណើរ</a> នៅក្នុងជំពូក៣ សរសេរដោយ កូនចាបមាស

យកគោលដៅធ្វើកម្លាំងចិត្ត

អត្ថបទថ្មី

ប្រភេទអត្ថបទផ្សេងៗ