លើកទឹកចិត្ត

“ជីវិតដែលរឹងមាំមិនមែនជាជីវិតដែលអាចគេចផុតពីបញ្ហានោះទេ ប៉ុន្តែជាជីវិតដែលនៅតែអាចដើរបន្តទៅមុខបាន ទោះជាកន្លងមកធ្លាប់ឆ្លងកាត់ការឈឺចាប់ច្រើនប៉ុនណាក៏ដោយ”។

គុណតម្លៃពិតប្រាកដនៃជីវិតមនុស្សយើង គឺប្រៀបដូចជាបណ្ដូលនៃខ្មៅដៃមួយដើមអីុចឹងដែរ។ ខ្មៅដៃអាចធ្វើរឿងអស្ចារ្យជាច្រើនដែលយើងនឹកស្មានមិនដល់ ប៉ុន្តែទាល់តែវាយល់ព្រមឆ្លងកាត់ប្រអប់ចិតខ្មៅដៃជាមុនសិន។ វាប្រហែលជារងនូវការឈឺចាប់ខ្លាំង រាល់ពេលដែលត្រូវគេដាក់ចូលទៅក្នុងប្រអប់ចិតខ្មៅដៃម្ដងៗ ប៉ុន្តែបើវាមិនអាចទ្រាំជាមួយការឈឺចាប់នេះបានទេ វាក៏គ្មានថ្ងៃអាចរកឃើញភាពអស្ចារ្យដែលមាននៅខាងក្នុងខ្លួនវាដែរ។ នៅលើគល់នៃខ្មៅដៃមួយដើមគឺមានជ័រលុបមួយដែលគេនឹងប្រើវាដើម្បីលុប (កែប្រែកំហុស)ដែលត្រូវបង្កើតដោយបណ្ដូលខ្មៅដៃនៅខាងចុង។

អ្វីដែលយើងត្រូវការខ្មៅដៃមួយដើមគឺបណ្ដូលរបស់វា ប៉ុន្តែដើម្បីអាចទាញយកផលប្រយោជន៍ពីបណ្ដូលខ្មៅដៃបានវាទាមទារឱ្យខ្មៅដៃចេះអត់ទ្រាំចំពោះការឈឺចាប់ខាងក្រៅ (សំបក)របស់វា។ សំបកខាងក្រៅនៃខ្មៅដៃមិនអាចការពារបណ្ដូលខាងក្នុងរបស់ខ្លួនបានទេ។ ប៉ុន្តែបណ្ដូលដែលគេត្រូវការនោះហើយ ដែលជាគុណតម្លៃពិតប្រាដករបស់វា។ ខ្មៅដៃមួយដើមក៏គង់តែអាចផ្ដល់មេរៀនមួយសម្រាប់ជីវិតយើងបានដែរ។ នៅពេលណាដែលអ្នកស្ថិតនៅក្នុងអារម្មណ៍មានបញ្ហាពិបាកក្នុងការដោះស្រាយ សូមចងចាំថា៖

“កុំបណ្ដោយឱ្យខ្លួនឯងបាក់ទឹកចិត្ត និងគិតថាខ្លួនឯងមិនល្អពីព្រោះចង់ឬមិនចង់ក៏មានន័យថាអ្នកកំពុងតែដាក់សម្ពាធផ្លូវចិត្តយ៉ាងធ្ងន់ធ្ងរចំពោះខ្លួនឯងហើយ”។

“កុំត្អូញត្អែរដែលត្រូវទទួលរងការឈឺចាប់ ពីព្រោះការឈឺចាប់នេះជាអ្នកដែលជួយយើងក្នុងការស្វែងរកភាពរឹងមាំ ចេញពីខាងក្នុងចិត្តមក។ មនុស្សធម្មតានឹងត្អូញត្អែរឱ្យគេបានដឹងឮពីទុក្ខលំបាករបស់ខ្លួន ប៉ុន្តែមនុស្សដែលរឹងមាំនឹងបង្ហាញថាខ្លួនអាចធ្វើបានបើទោះបីជាត្រូវលំបាកយ៉ាងណាក៏ដោយ”។

“យើងពិតជាអាចធ្វើនូវរឿងដ៏អស្ចារ្យជាច្រើនដែលអ្នកឯទៀតធ្វើមិនបានដូចយើង ប៉ុន្តែយើងត្រូវតែជឿជាមុនសិន ថាយើងពិតជាអាចធ្វើបាន ហើយក៏ត្រូវផ្ដល់កម្លាំងចិត្តឱ្យខ្លួនឯងជានិច្ច”។

“ដរាបណាយើងនៅតែមានដង្ហើមដកនៅឡើយ យើងក៏មិនត្រូវបោះបង់ចោលការពុះពារតស៊ូ និងក្ដីស្រមៃក្នុងការសម្រេចគោលដៅក្នុងជីវិតចោលឡើយ”។

“អ្នកដែលនៅជុំវិញយើងគេអាចនឹងជឿលើយើងខ្លះ ឬគេមិនជឿលើយើងខ្លះក៏ពិតមែន ប៉ុន្តែយើងមិនអាចបាត់បង់ជំនឿចិត្តចំពោះខ្លួនឯងជាដាច់ខាត មិនថាស្ថិតនៅក្នុងស្ថានភាពណាក៏ដោយចុះ”។

“ពេលវេលានឹងរសាត់ផុតទៅដោយមិនអាចទាញថយក្រោយបាន ប៉ុន្តែសូមឱ្យវាជាពេលវេលាដែលយើងលះបង់ ដើម្បីធ្វើរឿងមានប្រយោជន៍ចំពោះអ្នកដទៃ សូមកុំឱ្យវាជាពេលដែលបាត់បង់ទៅព្រោះតែគិតលើរឿងឥតប្រយោជន៍របស់អ្នកដទៃ”។

វាមិនពិបាកខ្លាំងពេកទេ បើដើម្បីតែទទួលបានភាពជោគជ័យនៅក្នុងជីវិត ប៉ុន្តែវាមិនមែនជារឿងងាយស្រួលឡើយដែលមនុស្សម្នាក់អាចទទួលបានជោគជ័យ ស្របពេលដែលខ្លួនឯងក៏បានរកឃើញពីអត្ថន័យពិតនៃជីវិតដែលខ្លួនបានចំណាយមួយរយៈដើម្បីរស់នៅលើភពផែនដីនេះ។

---------------------------------------------------------<br><br>អត្ថបទដកស្រង់ពីសៀវភៅ<a href="https://bit.ly/3Ayz7Ja"><b> វិញ្ញាសាជីវិត</b></a>&nbsp;

ហ៊ានទទួលយកក្ដីឈឺចាប់

អត្ថបទថ្មី

ប្រភេទអត្ថបទផ្សេងៗ