បន្តរៀន បន្តរស់
និពន្ធដោយ៖ អោ ខៃណា (កូនជីងចក់)
តម្លៃ: ៣២០០០ រៀល
ដំណក់ទឹកខ្មៅដែលដៅនៅលើសៀវភៅ “បន្តរៀន បន្តរស់” ដែលបងៗប្អូនៗកំពុងតែកាន់អាននៅនឹងដៃនេះ គឺជាយានជំនិះជិះទៅរកគោលគំនិតសំខាន់ៗដើម្បីជាជំនួយជួយជំរុញដល់បងប្អូនឱ្យកាន់តែមានកម្លាំងចិត្តក្នុងការបន្តខិតខំប្រឹងប្រែងសិក្សារៀនសូត្រ (បន្តរៀន) បន្ថែមទៀត ព្រោះពាក្យថា “ជីវិត” ស្មើនឹងពាក្យថា “រៀន” រៀនគ្មានទីបញ្ចប់ រៀនគ្រប់ពេលវេលា គ្រប់ទីកន្លែង។ សៀវភៅនេះផងដែរត្រូវបានពូតជាដុំផ្សំពី៣ចំពូកធំៗក្នុងនោះរួមមាន៖
ចំពូកទី១ បន្តរៀន បន្តរស់ សង្គ្រោះខ្លួនឯង
ចំពូកទី០ បន្តរៀន បន្តរស់ សង្គ្រោះគ្រួសារ
ចំពូកទី០ បន្តរៀន បន្តរស់ សង្គ្រោះសង្គមជាតិ
អុញ...ហេតុអ្វីបានជាចំពូកទី២ និងចំពូកទី៣ ប្តូរទៅជាចំពូកទី០ អ៊ីចឹង? មិត្តអ្នកអានជាទីគោរពស្រឡាញ់! បើយើងរួមផ្សំធាតុទាំងបីនេះបញ្ចូលគ្នា យើងប្រាកដជាទទួលបានលេខ១០០ (នេះជាគោលគំនិតរបស់ខ្ញុំ)។ ចំពូកទី១ ជាការបន្តរៀន ដើម្បីជួយសង្គ្រោះខ្លួនឯង ដ្បិតថាប្រសិនបើយើងមិនអាចជួយសង្គ្រោះខ្លួនឯងបានទេ នោះយើងក៏មិនអាចជួយសង្គ្រោះគ្រួសារនិងសង្គមជាតិបានឡើយ។ យើងអាចធ្វើប្រមាណវិធីក្នុងន័យនេះថា ១០០ – ១ = ០០។
ដំណើររាប់ពាន់យោជន៍ចាប់ផ្តើមពីមួយជំហាន។ ដំណើរដើម្បីជួយសង្គ្រោះគ្រួសារនិងសង្គមជាតិ ចាប់ផ្តើមពីការជួយសង្គ្រោះខ្លួនឯងជាមុនសិន ដ្បិតបើខ្លួនឯងខ្លាំង នោះអ្វីៗដែលនៅក្បែរខ្លួននឹងខ្លាំងទៅជាមួយគ្នា។ បុគ្គលដែលអស្ចារ្យមានខ្លួនជាទីពឹងរបស់ខ្លួន មានខ្លួនជាក្តីសង្ឃឹមរបស់ខ្លួន មានខ្លួនជាធុងចម្រោះសម្រាប់ច្រោះយកពុទ្ធិល្អៗចូលក្នុងជីវិតរបស់ខ្លួន។ គ្រួសារដែលសំណាង គឺមានកូនៗស្រឡាញ់ការសិក្សារៀនសូត្រ ឱ្យតម្លៃលើចំណេះវិជ្ជា តស៊ូពុះពារទោះបីត្រូវព្យុះ ភ្លៀង ក្តៅ រងា វេទនាយ៉ាងណាក៏ដោយ ក៏មិនបោះបង់ការសិក្សាចោលដែរ។ សង្គមជាតិមួយខ្លាំង លុះត្រាតែមានធនធានខួរក្បាលមនុស្សខ្លាំង។ មានធនធានខួរក្បាលមនុស្សខ្លាំង លុះត្រាតែមានចំណេះដឹងខ្លាំង។ មានចំណេះដឹងខ្លាំង លុះត្រាតែមានការខិតខំប្រឹងប្រែងសិក្សារៀនសូត្រខ្លាំង។ ភាពខ្លាំងទាំងអស់នេះត្រូវដុះភ្ជាប់ជាមួយនឹងសីលធម៌ សុជីវធម៌ និងគុណធម៌។
ការប្រឹងប្រែងយកចំពុះដ៏ខ្ចីរបស់កូនមាន់មកចឹកបំបែកសម្បកស៊ុត ធ្វើឱ្យវាមានជីវិត ប៉ុន្តែបើវាមិនធ្វើដូច្នោះទេ វានឹងក្លាយជាពងមាន់ចាំសម្បុកជាក់ជាមិនខាន។ ដើមឈើដ៏ធំអស្ចារ្យអាចផ្តល់ផ្លែផ្កា និងម្លប់ត្រជាក់ត្រឈឹងត្រឈៃជូនមនុស្ស និងសព្វសត្វទាំងពួងបាន កើតចេញពីកូនគ្រាប់រុក្ខជាតិដ៏តូចល្អិតមួយគ្រាប់តែប៉ុណ្ណោះ។
ដំណើរនៃការបន្តរៀនគឺជាជំហាននៃការបន្តរស់។ រស់គឺរៀន តែកុំរៀនដើម្បីតែរស់ រៀនដើម្បីសង្គ្រោះខ្លួនឯងពីភាពអវិជ្ជា និងតណ្ហាទាំងឡាយ។ កូនដែលអស្ចារ្យ បន្តខិតខំប្រឹងប្រែងសិក្សា សង្គ្រោះគ្រួសារ ឱ្យរុងរឿងថ្លៃថ្លា ប្រកបដោយសុភមង្គល។យើងគ្រប់គ្នាកើតមកមិនមែនជាមនុស្សអស្ចារ្យ តែយើងអាចធ្វើសកម្មភាពជាមួយក្តីស្រឡាញ់ដ៏អស្ចារ្យដើម្បីជួយសង្គ្រោះសង្គមជាតិរបស់ពួកយើង។
ជាចុងបញ្ចប់នៃអារម្ភកថានេះ ខ្ញុំបាទសូមប្រសិទ្ធពរជ័យសិរីមហាប្រសើរជូនដល់មិត្តអ្នកអានទាំងអស់គ្នា ឱ្យចួបប្រទះតែសេចក្តីសុខ សេចក្តីចម្រើន កើនបញ្ញា ថ្លាគំនិត គិតនិងធ្វើអ្វីមួយសុំសម្រេចជោគជ័យគ្រប់ភារៈកិច្ច។ សូមឱ្យកម្លាំងនៃការខិតខំប្រឹងប្រែងសិក្សារៀនសូត្ររបស់បងៗប្អូនៗក្លាយជាអំណាចដែលអាចជួយសង្គ្រោះខ្លួនឯង គ្រួសារ និងសង្គមជាតិទាំងមូលបាន។
