ពាក្យថាស្រលាញ់
និពន្ធដោយ៖ គង់ ចន្ទវ៉ាន់ណេង
តម្លៃ: ៣២០០០ រៀល
«ទេវតានៃមនោសញ្ចេតនា» គឺជាឈ្មោះមួយដែលបងប្រុសម្នាក់ បានប្រសិទ្ធនាមឱ្យខ្ញុំបន្ទាប់ពីគាត់បានអានរឿងមួយនេះចប់ ហើយខ្ញុំពេញចិត្តនឹងឈ្មោះមួយនេះខ្លាំងមែនទែន។
ប្រលោមលោកមួយនេះផ្ទុកនូវរាប់ពាន់មនោសញ្ចេតនារបស់ខ្ញុំ ព្រោះគ្រប់តួអក្សរដែលត្រូវបានប្រថាប់ឡើង សុទ្ធតែចេញពីបេះដូងរបស់ខ្ញុំ។ ខ្ញុំមិនមែនត្រឹមតែជាអ្នកនិពន្ធប៉ុណ្ណោះទេ ប៉ុន្តែពេលសរសេរប្រលោមលោកបែបបុរសទីមួយ ខ្ញុំដាក់ខ្លួនឯងជាតួអង្គក្នុងរឿងដែរ។ បើតួអង្គរបស់ខ្ញុំយំ ខ្ញុំក៏យំដូចគ្នា។ បើតួអង្គរបស់ខ្ញុំខូចចិត្ត ខ្ញុំក៏ខូចចិត្តដូចគ្នា។ ព្រោះមនោសញ្ចេតនាជាភាសាសកលដែលគ្រប់គ្នាអាចពាល់ដឹង ទោះយើងជាអ្នកណាក៏ដោយ ឱ្យតែមានក្ដីស្រលាញ់ ឱ្យតែមានការឈឺចាប់ គ្មានអ្វីមកវាស់ពីជម្រៅមនោសញ្ចេតនារបស់យើងបានឡើយ។
ការពិត ស្នាដៃមួយនេះធ្លាប់បានចេញផ្សាយនៅលើទំព័រហ្វេសប៊ុកផ្លូវការរបស់ iRead ម្ដងរួចមកហើយ ប៉ុន្តែវាជាខ្សែជីវិតនិងរឿងស្នេហារបស់វ៉ាន់ឌីតែប៉ុណ្ណោះ។ ចំណែកសុក្រឹតដែលជាតួអង្គជាទីស្រលាញ់របស់មិត្តអ្នកអាន នៅមិនទាន់ចួបស្នេហាសមបំណងនៅឡើយទេ។
ដូច្នេះហើយទើប «ពាក្យថាស្រលាញ់» មានរូបរាងជាសៀវភៅក្នុងនាមជាប្រលោមលោកដែលមាន ៨ ភាគ និយាយពីជីវិតរបស់វ៉ាន់ឌី និង ជីវិតរបស់សុក្រឹត ដែលជាមនុស្សពីរនាក់ធ្លាប់ស្រលាញ់គ្នា ប៉ុន្តែមិនបានដើរលើវិថីរួមគ្នា។
ខ្ញុំដឹងថា មានការខកបំណងពីមិត្តអ្នកអាន នៅពេលដែលមនុស្សពីរនាក់ស្រលាញ់គ្នា តែមិនអាចរស់នៅជាមួយគ្នាបាន។ ខ្ញុំពីមុនក៏យល់បែបនេះដែរ! ឱ្យតែស្រលាញ់គ្នាគឺអាចរស់នៅជាមួយគ្នាបានហើយ ព្រោះគ្មានអ្វីធំជាង «ពាក្យថាស្រលាញ់» នោះទេ។ ប៉ុន្តែ... អត្ថន័យនៃពាក្យនេះវាហាក់ដូចជាមានន័យធំទូលាយជាងអត្ថន័យដែលត្រូវបានពន្យល់ក្នុងវចនានុក្រម នៅពេលយើងយកវាមកប្រើក្នុងជីវិតពិត។
យ៉ាងណាក៏ដោយ ខ្ញុំសង្ឃឹមថាមិត្តអ្នកអាននឹងពេញចិត្តស្នាដៃមួយនេះ ហើយអាចស្វែងរកអត្ថន័យនៃពាក្យថាស្រលាញ់សម្រាប់ជីវិតផ្ទាល់ខ្លួនរបស់អ្នកទាំងអស់គ្នាបាន។
ដោយក្ដីស្រលាញ់រាប់អាន
គង់ ច័ន្ទវ៉ាន់ណេង